Gujjars-te'n nawrh an huaihawt chhunzawm

Rajasthan-a Gujjars hnam chuan nimin khan sorkar hna siamah an hnam puala 5% reservation siam phutin nawrh an huaihawt chhunzawm leh a, rel kawng an dan avangin Delhi-Mumbai inkara tlan rel tam tak an khaihlak phah.

Gujjars te hian nimin khan Bharatpur district-ah rel kawng an dang leh a, khualzin phur leh bungraw phur rel 15-20 vel an din a ngaih phah a ni. Rel kawng dan a nih hian Western Railways chuan ni khatah cheng vaibelchhe 12-15 vel a hloh phah ṭhin a ni.

State sorkar chuan Gujjars hnamte hi an thil phut chungchangah Jaipur-a inbiakna neihpuiah a sawm. Mahse Gujjar Arakshan Sangharsh Samiti thupuangtu, Himmat Singh chuan, "A tirah chuan Jaipur-a kalin sorkar aiawhte hmuh kan remti a, mahse a hnuah kan ngaihdan hi thlak lehin sorkar rawtna hi pawm loh kan rel leh ta zawk a ni," a ti. Jaipur kal an tum loh thu hi district thuneitute hnenah pawh ziakin an pe tih a sawi.

Kar kalta Inrinni khan inremna zawngin Gujjars leh committee of minister chu Bayana-ah an inbia a, mahse inremna siam loin an ṭin.