Delhi assembly special session neih a ni

Ni hnih awh tur, Delhi assembly special session chu nimin khan ṭan a ni. Delhi-a rorellai, Aam Aadmi Party (AAP) chuan state pui­tlinga Delhi hlangkai tura nawr zel a tum a, hemi chungchangah hian mipuite ngaihdan lak rawtna pawh siam a tum.

Delhi acting Chief Secretary ruat chung­changa Delhi Lieutenant Governor Najeeb Jung leh Chief Minister Arvind Kejriwal-te intihthiam loh avangin assembly special session hi koh a ni. An buainaah hian BJP kaihhruai sorkar laipui chuan LG hi ṭanin, a ṭanna lam hawiin hriat­tirna pawh a tihchhuak a, sorkar hnathawk lian posting leh transfer chung­changah LG hian thu a nei a ni tiin, he thilah hian Delhi sorkar a rawn kher a ngai lo tiin a sawi. Hei vang hian assembly-ah pawh sorkar laipui hriat­tirna tihchhuah chung­chang hi ngaihtuah a ni.

Nimina rorel inkhawm­ah hian AAP sorkar chuan Ministry of Home Affairs (MHA) in LG ṭan zawnga thu­chhuah a siam chung­chang sawihona tur motion a put lut a, MHA thu­chhuah chu Delhi mipuite'n an aiawh tura an thlan chhuah sorkar zah lohna a ni, a ti. Delhi assembly chu LG paihthla tura thuneihna pek an phut a ni.

Motion puluttu, Deputy Chief Minister Manish Sisodia chuan MHA thuchhuah chu ram danpui kalh a ni, a ti bawk.

Thawhṭanni khan AAP hian Delhi-a ni 100 sorkarna a siam tlinna pualin Connaught Place, Central Park-ah vantlang inkhawm a buatsaih bawk a, hetah hian CM Kejriwal chuan ni 100 chhung­a a kaihhruai sorkar hna­thawh leh hlawhtlinna neih tawh hrang hrangte a tarlang. Kejriwal chuan AAP sorkarin rim takin hna a thawk a, mipuite pawh sorkar hnathawh danah an lungawi tawk niin a sawi.