PM-in DD Kisan channel hawng

Prime Minister Narendra Modi-a'n nimin khan loneitute puala TV channel siam thar, Kisan TV chu Vigyan Bhawan, New Delhi-ah a hawng.

Doordarshan-in Kisan TV a siam tur hi Finance Minister Arun Jaitley chuan union budget a pharh ṭum khan a lo puang tawh a ni. Jaitley chuan DD Kisan hian ramchhung hmun kilkhawr zawka loneitute tan lo neih lama thil ṭangkai leh hmanraw thar awmte a hriattir ṭhin ang. Hei bakah hian an tana ṭangkai tur thil dang­te pawh dah lan ṭhin a ni ang, a ti.

PM chuan Kisan TV hi ṭha a tih thu a lo sawi tawh a, a chenna inah senior official-te chuan TV channel hawn a nih dan turte vawi eng emaw zat a lo sawipui tawh bawk. Meeting-ah hian Prasar Bharati Chairman Dr Surya Prakash leh Information and Broadcasting Secretary Bimal Julka-te pawh an tel.