J&k-ah security force ten firfiak pahnih man

Jammu and Kashmir-a Kulgam district-a Jawahar Tunnel bula security force-ten joint operation an neihnaah firfiak pahnih an man a, silai leh a mu ṭhahnem tham tak an man tel bawk. 

Tun hnaiah J&K-ah hian firfiak man an ni fo a, tualchhung police leh sipai ṭangkawpte pawhin firfiakte lakah joint operatin an lo nei dun fo tawh bawk a ni. Thawhlehni zan leh nimin thleng khan security force-te chuan operation an nei leh a, Thawhlehni zan khan Jawahar Tunnel bula national highway-ah truck a chuang firfiak pahnih chu an man ta a ni.

Heng firfiak pahnih an man tak te hnen aṭang hian silai leh a mu ṭha hnem tak man a ni a, Chinese pistol paruk leh a magazine 12, AK-47 rifle pakhat leh a magazine pahnih bakah, M4 US Carbine silai pakhat leh a magazine pathum man sak an ni. 

J&K Police official-te sawi dan chuan report an dawn bawhzuiin Jammu aṭanga Srinagar pan tur truck chhungah silai leh ralthuam a awm thu an dawng a, security force-te chuan Jawahar tunnel aṭangin he truck hi an lo chang ta a ni. He truck a silai leh thil dang mansak an nih avang hian an mi man pahnihte hi man zui an ni bawk.