Health ministry-in school hawn huna SOP hman tur a tichhuak

Union Ministry of Health and Family Welfare chuan Thawhlehni khan September 21 aṭanga school hawng duhte tana an zawm tur standard operating procedure (SOP) a tichhuak.

SOP hi class 9 aṭanga 12 zirlaite zawm tur atana siam a ni. Ministry of home affairs tarlan dan chuan Containment zone lo zawngah chuan zirtirtu leh non-teaching staff 50% chu school-ah an kal thei dawn a, mahse he hunah hian dan pangngai anga naupang zirtir erawh a la theih dawn loh a ni.

Class 9 aṭanga 12 zirlai te chu September 21 aṭang hian an school-ah kal phalsak an ni dawn a, mahse school-ah hian zirtirtute thurawn leh an zir dan tur chungchang atan chauh school kal phalsak an ni thung. School tlawh tur hian zirlai te hian an nu leh pa hnen emaw an awmpui/chenpui te emaw hnen aṭangin phalna an nei tur a ni. Home affairs hian school hi hawn vek tur angin a ti hran lo a, voluntary anga hawng duh tan a phalsak tihna a ni. 

1)     School room chhungah zirlaite chu feet ruk dana inhlatin an awm tur a ni. 

2)     Hmaituamna an hmang vek tur a ni.

3)     Zirlaite hian an kut chu sahbawnin second 40-60 tal an sil tur a ni a, a nih loh vek chuan hand sanitiser hmangin second 20 tal an kut an nuai tur a ni

4)     Class room chhungah zirlai te chu an khuh dawnin an hmai an tuam ṭha hle tur a ni a, hmaituamna hmang mah se an khuh dawn chuan an rawmawl emaw tissue emaw an banin emaw an ka chu an khuh tal tur a ni. Hei hi khauh taka kalpui tum a ni bawk

5)     Damlohna nei  chu a rang thei ang bera thuneitute hnena inhriattir nghal vat tur a ni

6)     Chil chhak phah loh a ni

7)     Zirlai te chuan Aarogya Setu App an hmang vek tur a ni

8)     Online/distance learning chu la kal pui zel a ni ang 

Ministry of home affairs chuan September 30 thleng chu school, college, educational leh coaching institution-te chu dan pangngai anga zirna in kalpui chu a la khap a ni.