NEHU VC term pawhsei duh lo

North Eastern Hills University (NEHU) Joint Action Committee chuan vice-chancellor Prof SK Srivastava term chu pawhsei an duh loh thu sawiin, Thawhlehni khan silent protest an huaihawt.  

Joint Action Committee-ah hian NEHUTA, NEHUNTSA leh NEHUSU an tel vek a ni. 

Nawrh huaihawttute chuan Professor Srivastava hian hna a thawk ṭha lo hle tih sawiin, VC a nih chhungin university tan hlawkpuina tur thil engmah tih a nei lo niin an sawi. Joint Action Committee chairman Prof Xavier Mao chuan VC hian University Code pawh a zawm lo a, eng meeting mah a ko ngai lo tih a sawi. University annual account, annual report, annual budget te chu meeting ko loin, dan kalhin a lo pawm ṭhin a, Parliament-ah information dik lo a pe ṭhin a ni, a ti. 

Prof Srivastava hi a September 23 hian a VC term a tawp dawn a, hei vang hian Joint Action Committee chuan a term zawh hnuah ni khat pawh a hun hi pawhsei lo turin an lo nawr lawk nghal a ni.