Guyana leh Dominica-in PM hnenah chawimawina an hlan

Guyana leh Dominica ram chuan an ram chawimawina sang chu prime minister Narendra Modi hnenah an hlan. Hei hi Covid-19 hri len laia hrileng dona tura khawvel huapa a thawh hlawk vang leh, heng Caribbean ram pahnihte thuam chakna kawnga a thawhna vanga hlan an ni.

PM hian ram pathum tlawha a zin chhuahnaa a hun hman tawpna, Guyana ah hian cham mekin Nilaini khan Guyana President Irfan Ali chuan 'The Order of Excellence' hi a hlan. Dominica President Sylvanie Burton pawh hian CARICOM Summit neih kar lakah 'Dominica Award of Honour' a lo hlan ve bawk. Guyana ramin ram dangmi hnena an ram chawimawina sang an hlan zingah PM Modi chu dawng thei palina a ni.

PM chuan X ah post siamin,"Dominica in national award sang ber min hlan chu India mipui vbc 140 tan ka hlan a ni" tiin, MEA pawhin post siam vein,"He chawimawina hi Covid-19 hri len laia Dominica tana PM-in a beihna leh, India -Dominica inkar ti chak tura a beihna lan tirtu a ni" tiin an tarlang.

Chawimawina hlan a ni chu khawvel harsatna hmachhawn tura thawhhona ṭha neih a pawimawh zia leh, sik leh sa in thlak danglam ṭhin beih letna kawnga India inpumpekna ti lang tu a nih thu PM chuan a sawi

Barbados ram pawhin Modi hnenah hian chawimawina an hlan leh dawn a, hei hi PM Narendra Modi-an ram dangte hnen aṭanga chawimawina a dawn 19-na tur a ni ang.