US court-in investor bum leh official thamna peah Adani a puh

US court chuan India mi, sumdawng hausa Gautam Adani leh a unaupa fapa, Sagar Adani bakah an thawhpui mi dang parukte chu investor-te bum leh, official-te thamna peah a puh.

Gautam Adani hi khawvel huap pawha pa hausa lang pha niin, US Securities and Exchange Commission chuan a company-in solar energy project lian tham tak a thawh chu investor-te an sum an laksak hmanga official-te hnena thamna an pek vanga project hi pek an ni tiin a sawi.

Prosecutor-te chuan Adani leh mi dangte hian kum 2020/2021 vel aṭang khan inbumna hi an kalpui ṭan niin an sawi. An tum ber chu renewable energy companies, Adani Green leh Azure Power puih a India sorkar aṭanga dollar tluklehdingawn tel energy project hmuh a ni, an ti.

US court document-ah Adani hian Chhattisgarh, Tamil Nadu, Jammu & Kashmir, Odisha leh Andhra Pradesh-a state sorkar hnuaia power generation company-ah contract lian tak tak a hmu nia tarlan a ni bawk. Contract an hmuh theihna atan Sagar Adani chuan sorkar official-te chu thamna a pe ṭhin niin an sawi bawk.

Gautam Adani bakah mi dang pasarihte chu Court hian thil tisualah a puh. Hengte hi Sagar Adani bakah executive hlui Vineet Jain, Ranjit Gupt leh Rupesh Agarwal bakah, Canadian instutional investor-a thawk ṭhin Cyril Cabanes, Saurabh Agarwal leh Deepak Malhotra te an ni a, Foreign Corrupt Practices Act palzut tumah puh an ni.

US court-in Adani puhna a tih chhuah hnu hian Adani Group company hrang hrang share pawh tlahniamin, market value-ah USD tld 28 vel hloh nghal a ni. Flagship company Adani Enterprises share chu 23% in a tlahniam a; Adani Ports, Adani Total Gas , Adani Green, Adani Power, Adani Wilmar and Adani Energy Solutions, ACC, Ambuja Cements leh NDTV share pawh 20% leh 90% inkarah an tlahniam nghal bawk.