Nov 25 aṭangin Parliament thlasik ṭhutkhawm nei dawn

Parliament thlasik ṭhutkhawm chu kar leh Thawhṭanni, November 25, 2024 aṭangin neih a ni dawn a, December 20 thleng a awh ang.

Sorkar laipui chuan Parliament thlasik ṭhutkhawma pharh tur bill 15 tarlangin, heng zingah hian tunlaia thawm nei lian Waqf (amendment) bill pawh a tel. Hei bakah hian dan thar hman tur panga pawh telh a ni bawk.

Waqf(amendment) bill hi ngaihven hlawh ber tura ngaih a ni a, sorkar lam chuan pass ngei pawh a tum. Parliament joint committee chuan Lok Sabha-a report a pharh hnuah, he bill hi pass ngei a nih theih nan a ennawn leh mek bawk a ni. Hetih lai hian panel-a eptu member-te chuan bill hi zirchianna turin hun tam zawk an la mamawh tih an sawi thung a, Lok Sabha speaker hnenah pawh ziakin an lo thlen tawh bawk. Waqf committee pawh November 29 hmaa report thehlut tura tih a ni.

WaqfAmmendment bill bakah hian, Disaster Management(amendment) bill, Readjustment of Representation of Scheduled Tribes in Assembly Constituencies of Goa Bill, Carriage of Goods by Sea Bill 2024, Railways (Amendment) Bill, leh the Banking Laws (Amendment) Bill te chu ngaihtuah tur zingah an tel a,Coastal Shipping bill leh Indian Ports bill chu pharh a ni dawn bawk. Lok Sabha-ah hian bill tang, pending bill pariat awm mekin, Rajya Sabha-ah pahnih a awm bawk.