Chhattisgarh-a inkahna thlengah Naxal hel 10 an thi

Chhattisgarh-a nimina security force leh Naxal helte inkahna thlengah Naxal hel 10 an thi.

Inkahna hi Sukma district-a Bhansarpadar ramhnuaia thleng a ni a, security force-te hian hel 10 an kah hlum bakah an inkahna hmun aṭang hian ralthuam - INSAS rifle, AK-47 rifle leh Self Loading Rifle (SLR) bakah silai mu eng emaw zat an man bawk.

"Sukma huamchhungah hel an awm thu dawn chu bawhzuiin District Reserve Guard(DRG) leh Central Reserve Police Force (CRPF) ṭangkawp chuan beihpui an thlak a, inkahna nasa tak a thleng zui a ni," tiin Bastar police officer chuan a sawi.

Kumin chhung hian Maoist hel 207 chuang chu kah hlum ni tawhin, security force-ten Bastar zone chu an thunun tawh a ni. Hel nena inkahnaah hian police leh sipai mi leh sa thi leh hliam an la awm lo nia report a ni bawk.

Chief minister Vishnu Deo Sai pawhin venhim hna thawktute chet dan chuan a ti lawm hle tih sawiin, an state chu helpawl Maoist awm lohna hmuna siam turin sorkar chuan theihtawp a chhuah mek thu a sawi a ni.