Rijiju-a'n Naqvi thusawi a chhang let

Union Minister Mukhtar Abbas Naqvi-a'n bawngsa ei loa awm theilote Pakistan-ah an kal vek thei ang tia a sawi chuan sawi zui a hlawh hle a, NDA sorkar hnuaia a thawhpui union minister vêk, Kiren Rijiju chuan Naqvi hi a chhang let.

Minister of State for Home, Rijiju chuan bawngsa chung­changah Naqvi thusawi dan chu a ṭha lo hle a ni, a ti. "Bawngsa ka ei a, Arunachal Pradesh mi ka ni, tuin nge min dang ang? Midangte thiltih danah hian duh lo thlan saka, lo inrawlh ve vak tur a ni lo," a ti.

Kar hmasa khan Naqvi hian private TV channel-in a kawmnaah, BJP sorkarna state pahnih, Maharashtra leh Haryana-a bawng talh leh a sa ei khapna dan siam chu ṭha a tih thu a sawi a, "He thil hi sum lama hlawkna leh hlohna lam a ni lo a, sakhaw rinna lam thil a ni. Hindu-te tan chuan thil pawimawh a ni a, bawngsa ei loa awm thei lote chu Pakistan-ah emaw, Arab ramte leh bawngsa ei theihna ram dangah te an kal thei ang," tiin a sawi.

Rijiju chuan Naqvi thusawi hi thu hriat nuam loh tak a ni tih sawiin, bawng sa ei uarna, a bikin hmarchhak state-ahte chuan khap a ni ve lo ang, a ti.

Minister chuan, "Maharashtra chu Hindu tamna a ni a, Hindu rindan zulzuia dan an lo siam a nih pawhin lo siam mai rawh se. Mahse hmarchhak bialah chuan mi tam zawkin bawngsa kan ei a, hei vang hian kan nun danah lo buai suh se. Mitinte hi kan awmna leh kan tihdan phungte hi kan inzahtawn sak a ngai a ni," a ti.

"India ram chu hnam hrang hrang, sakhua leh rin dan hrang hrangte awmna ram a ni a, kan inzahtawn thiam a ngai a ni. Hei vang hian sakhaw thil leh hnam thil kaihhnawih leh mi khei zawnga thusawi hi a a ṭha ngai lo," a ti. Hemi rual hian Naqvi hian a mimal ngaihdan leh thlir dan sawichhuak turin zalenna a nei a ni a, hei hi sorkar leh party ngaihdan a ni lo tih a sawi tel bawk.