PM Modi-a'n Congress a bei

Prime Minister Narendra Modi chuan Congress party chu beiin, UPA-in kum 10 sorkarna a chelh chhung khan ram danpuiin a pawmsak bakin thuneihna tam tak an la a ni, a ti.

Modi chuan Congress vice President Rahul Gandhi-a'n NDA sorkar chu mihausate mil leh mi retheite rapbet sorkar tia a sawi pawh chhang letin, Congress party chuan nikum inthlanpuia an tlawm dan chu an la pawmdam thiam lo a ni, a ti.

NDA sorkar hnuaiah thuneihna chu Prime Minister Office (PMO)-a sawrbing nia sawi pawh Modi chuan chhang letin, "Prime Miniter leh PMO pawh hi constitutional scheme peng vek an ni," a ti.

NGO khap chungchanga Home Ministry hmalakna pawh chhanin, PM chuan dan kalh zawngin sorkarin eng tin mah hma a la lo a, ram hmangaihtu dik tak chuan an thiltih chu an dodal a rin loh thu a sawi.

Ram hrang hrang tlawha a zin chhuah chungchangah pawh eptute chuan thu dik tawk lo te an thehdarh fo niin PM chuan a sawi bawk. "Kan tum ber chu hnathawk ṭha, mipuite ngaihsaktu sorkar ṭha siam a ni," a ti.