Dik lo takin ka thuneihna ka hmang ngai lo : Manmohan Singh

Prime Minister hlui Manmohan Singh chuan Prime Minister office a luah laiin a thuneihna chu amah, a chhungte leh ṭhiante'n an hlawkpuina tura dik lo taka a hman ngai loh thu a sawi.

PM hlui hian he thu hi New Delhi-a Cong­ress affiliated, National Stu­dents Union of India (NSUI) national conven­tion-ah TRAI chiarman hlui, Pradip Baijal-a'n a puhna chhangletin he thu hi a sawi a ni.

Thawhlehni khan Baijal chuan a lehkhabu ziah, 'The Complete Sto­ry of Indian Reforms: 2G, Power and Private Enter­prise- A Prac­ti­­tioner's Diary' a tih­chhuah­­ah, PM hlui Man­mo­han Singh hian 2G scam chung­chang pawh a hria a, phalna pek chhuah danah a thawhpui loh chuan a tana a ṭhat loh tur thu thlengin a vau niin a sawi.

Singh chuan, "Kei leh ka chhungte, ka ṭhiante hlawkna tur zawngin ka thuneihna ka hmang ngai lo," tiin, eirukna doin an thawk a, hei hi an thawh chhunzawm zel tur thu a sawi.

Narendra Modi-a kaih­hruai NDA sorkar chu sawiselin, PM hlui chuan NDA sorkar chuan scheme engmah siam loin, UPA scheme-te an thar thawh a, hengte hi thil thar ang maiin an phochhuak mai a ni, a ti. "UPA scheme-te kha NDA sorkar hian a hming thlakin thil thar ang a kalpui a, heng scheme-te hi BJP-in eptu party an nih laia an dodalte kha a ni," tiin, PM Modi-a 'Make in India' policy pawh chu UPA sorkarin manufacturing policy thar a lo siam tawh carbon copy mai a ni, a ti.