WSJ leh NYT-te'n Modi-a sorkar an sawisel

Prime Minister Narendra Modi-a kaihhruai NDA sorkar chuan Thawhlehni khan kum khat a tling a, hemi pual hian PM chuan ram mipuite hnenah kum khat chhunga an hnathawh leh hlawhtlinna hrang hrangte a hriattir a, a lawmna atan hian ramchhung khawpui lianahte rally huaihawt tum a ni bawk.

Hetihlai hian America media-te chuan Modi-a sawiselna an lo tichhuak ve thung. Wall Street Journal (WSJ) chuan Modi-a sorkar kum khatna puala article a tihchhuahah, Modi-a buaina ber chu India ram harsatnate su kiang duak a, hma sawn pui nghal tura a laka beiseina lian tak awm chu a ni, a ti. Hei bakah hian Modi-a policy, 'Make in India' chu a nihna baka sawi vungah a puh bawk. Sorkarin hlawhtlinna hrang hrang a nei tawh nia a insawi laiin, hna thar siam lamah a la hnufum hle a ni, a ti.

WSJ chuan Modi-a tan a chak lawmna hun a zo a, chona hmachhawn hun a inṭan ta nia sawiin, "India mipuite'n an ram inthlak danglamna thlen duha Narendra Modi-a hnena thuneihna an hlan hnuah, thil hnawk tak tak a inṭan ve mek a ni," a ti. Economics lama hmasawnna pawh a kal chhet chhet niin a tarlang.

New York Times (NYT) pawhin Modi chuan thudik a hmachhawn a, agenda te chu a taka hlawhtlinna la awm lo, la inmung mai a ni tih a hriat a ngai a ni, a ti. "Ram pawn lam aṭang chuan India chuan hmabak eng tak neiin, kuminah economy lamah pawh China pel mai thei tura beisei a ni. Mahse ram chhungah hna thar siam hna a kalmuang a, eptute chuan mirethei leh loneitute ngaihthah sorkar niin an puh bawk," tiin a tarlang.

Orient Craft senior vice-president Vimarsh Razdan-a'n, 'Modi-a sorkar chuan an nihna bakin an inlantir a ni tia a lo sawi chu NYT hian a tarlang bawk. "Roreltute chu superhero angin an awm a, mahse mitinin superhero hi an awm lo tih an hria a ni," a ti.

Modi-a'n investor map-a India dah tuma New York, Paris, Sydney leh ram hrang hrang a tlawh kual chungchang chu WSJ chuan tarlangin, Modi-a hian nikuma inthlanpui neih hnua danglamna nasa tak thleng tura beiseina neitu investor-te a ti lunghnur a ni tiin a sawi. Modi-a sorkar chuan state sorkar enkawl bank leh company-te privatise lam a ngaihthah a, hei hian hnathawktu ban tir lam thlengin a nghawng thei dawn a ni, a ti.

Hemi rual hian WSJ leh NYT chuan Modi-a sorkarna chuan kum khat a tlinnaah hlawhtlinna sawi tur eng emaw zat a neih thu an tarlang bawk. Modi-a chuan railways leh defence lama foreign investment tam zawk a phalsak thu te, pension leh insurance program a siam leh, mi rethei tam takte bank account hawnsak an nih dante pawh an tarlang tel.