Delhi sorkarin Private lab-a RT-PCR test man tihniam

Delhi sorkar chuan private laboratory-a RT-PCR test man chu Rs 800-ah a ti hniam a, private-a sample lak, test man leh thildang manah a vaiin Rs 1,200-ah sorkar chuan a siam rem a ni. 

A hma khan test man hi Rs 2,400 a ni ṭhin a, Rs 800-ah Delhi sorkar chuan nimin khan tihniam a nih thu thuchhuah a siam a, he thuchhuah hi darkar 24 chhungin private hospital leh clinic-ten an zawm tur a ni tiin a sawi nghal bawk. 

Covid-19 hri kai leh kai loh test-na hi RT-PCR leh Rapid Antigen Test hmanga tih ṭhin a ni a, heng test-nate hi government testing centre leh hospital-ah a thlawna tih ṭhin a ni. Mahse private hospital leh clinic-ahte chuan man chawia tih ṭhin a ni a, private-a test duhte sum sen zat tihtlem a nih theih nana hma lak a nih thu Delhi chief minister Arvind Kejriwal chuan a sawi. 

State dang eng emaw zat pawhin RT-PCT test man hi an lo tihniam tawh a ni. Top medical research body, Indian Council of Medical Research (ICMR) chuan test manah bithliah a siam tawh dawn lo tih May thla khan a lo sawi tawh a, hei vang hian state tinten an state-ah test man an ruahman thei a ni. 

Delhi-ah hian nimin khan darkar 24 chhungin hri kai thar mi 1,487 an awm a, anni nen hian Delhi-a hri kai hmuh chhuah hi mi 35,091 an awm tawh tih Union Ministry of Health and Family Welfare chuan a tarlang.