Zomato-in Uber Eats lei

India food delivery startup 'Zomato' company chuan Uber Technologies Inc hnuaia awm 'Uber Eats' chu US dollar maktaduai 350-a an lei dawn thu an tarlang.

An leina man zat tur hi India pawisa chuan Rs cheng vaibelchhe 2,492 hu a ni. 'Uber Technologies Inc' food delivery business Uber Eats hian kum 2017 khan India-ah bul an rawn ṭan a, mahse an duh anga hlawkna an neih theih loh avangin hralh turin thutlukna an siam ta a ni. 

Internet hmanga India ram chhunga eitur order theihna chu Zomato leh Swiggy-te'n an thunun hnen em vangin Uber Eats hralh tura thutlukna hi company lam hian an siam ta niin a lang . "Online-a eitur chah nan Uber Eats app hi India ramah hman theih a ni tawh dawn lo a, mahse India ram pawnah chuan a la hman theih vek dawn tho a ni. India ram chhunga veivah nan Uber app a la hman theih reng bawk e," tiin Uber Eats chuan thuchhuah an siam. 

Zomato company hi India rama online food delivery lian ber an nichho mek a, an company hausakna pawh US dollar tluklehdingawn 3 a ni tawh tih Zomato CEO Deepinder Goyal chuan a sawi.