RLP-in farm law vangin BJP thawhpui tum tawh lo

Rashtriya Loktantrik Party (RLP)-a parliamentary chairper­son Hanuman Beniwal chuan sorkarin farm law a hnuhkir loh chuan an party chuan BJP thawh­pui an tum tawh loh thu a sawi.

Beniwal chuan Swaminath Commission rawtna chu  hmang turin sorkar laipui chu a ngen a, hemi chungchangah hian loneitute leh thuneitute chu inbe turin a duh thu pawh a sawi bawk. Kum 2019 April 4 khan Rashtriya Loktantrik Party chuan BJP kaihhruai National Democratic Alliance (NDA) an zawm a, nikuma Lok Sabha inthlan khan Nagaur constituency aṭangin Beniwal hi thlan tlin a ni.

Kum 2018-a Rajasthan legis­lative assembly inthlan khan Rash­triya Loktantrik Party hi consti­tuency 57-ah dingin seat thum an la a ni. He party hi kum 2018 October 29 khan din niin, party hlawhtling tak an ni thei nghal a ni.

Farm law duh lohna avang hian loneitu intelkhawm chu Delhi ramriah an kal khawm a, Delhi ramri Ghazipur, Singhu leh Tikri hmun chu loneitute hian an dang mek a ni.  State ṭhenawm aṭanga Delhi-a thlai hnah, oxygen cylinder leh thei phurh luh turte chu dan a nih vangin Delhi chuan harsatna a tawk mek a ni. Thawhṭanni khan union agriculture minister Narendra Singh Tomar chuan loneitu pawl hruaitute hi inbiakna neihpui turin a sawm a, December 3-a inbiak tura an lo rawt tawh chu khaw vawt leh hri leng vangin nimin zawkah nei turin a sawm a ni. 

A sawmna hi loneitu pawlte pawhin pawmin, nimin tlai lam khan union minister-te nen Delhi-a Vigyan Bhawan-ah inbiak­na hi an nei a, mahse he inbiak­naah hian Punjab-a Kisan Mazdoor Sangharsh Committee (KMSC) aiawhte chu a an tel duh lo thung. KMSC chuan inbiaknaah hian thlan bik awm loin, loneitu pawl zawng zawng aiawhte tel an phut a ni.