India ramah hmun pali WHIS tag pek a ni

India ramchhunga hmun pali chu kumin chhung hian World Heritage Irrigation Structure (WHIS) tag an pe. WHIS tag pek tharte chu Andhra Pradesh-a hmun pathum - Cumbum Tank, Kurnool-Cuddapah Canal, Porumamilla Tank-te bakah Maharashtra Sindhudurg district-a kum 490 laia upa Dhamapur Lake-te a ni.

Irrigation, drainage, leh flood management expert International Commission on Irrigation and Drainage (ICID), global network ni bawk chuan kumtinin UNESCO-in World Heritage Sites a pawm zul zuiin irrigation structures-te chu WHIS tag an pe ṭhin a ni. 

Kum 2018 pawh khan Telangana-a hmun pahnih Pedda Cheru Tank leh Sadar­mat Anicut-te chu WHIS site-ah a lo puang tawh. Central Water Commi­ssion (CWC) director Rishi Srivastava chuan November thla tir lamah khan heng hmun palite WHIS tag pek an nih tur chungchangah hian hriattirna an dawn thu sawiin heng structure ṭha tak takte hi khawvelin a hriatpui chu thil hlu tak a nih thu a sawi. 

Heng hmunte hi siam an nih lai kha ngaihtuah chuan an lo remhre hle tih sawiin a enkawlna kawngah state sorkarte pawhin mawh­phurhna an la nasa lehzual dawn tih a sawi bawk. Kuminah hian China-ah pawh hmun pali World Heritage Irrigation Structure tag pek thar a awm a, Iran-ah pahnih awm bawkin Japan-ah pathum a awm bawk a ni. Japan chu WHIS site ngah ber ram niin 42 an nei a, China chu a dawttu niin 23 a nei thung a, India leh Sri Lanka chuan paruk ve ve an nei bawk.