Jharkhand CM atan Hemant Soren

Jharkhand assembly inthlana hnehna an chan hnuah, Jharkhand Mukti Morcha(JMM) hruaitu Hemant Soren chuan Pathianni khan governor Santosh Gangwar hnenah sorkar thar siam a nih theihna atan chief minister a nihna aṭanga banna a thehlut. November 28-ah chief minister thar atan lak luh a ni ang.

Raj Bhavan a pan hmain Soren hian INDIA bloc-a MLA thlan tharte nen meeting an nei hmasa a, he hunah hian legislature party leader atan lungrual taka thlan a ni. Meeting neih zawhah hian Soren leh INDIA bloc hruaitute hian Raj Bhavan ah MLA thlan tlinten an thlawpna lehkha an thehlut nghal a ni. He hunah hian Jharkhand Congress in-charge Ghulam Ahmad Mir leh Rashtriya Janata Dal(RJD) leader Jay Prakash Narayan Yadav tel an telpui.

Governor hian Soren banna thehluh hi pawm sakin nominated CM atan a ruat nghal a,November 28-ah a kaihhruai sorkar thar chu lak luh turin a lo hrilh nghal bawk.

Assembly seat 81 awmah INDIA bloc hian seat 56 an la a, BJP kaihhruai National Democratic Alliance (NDA) chuan seat 24 lain, Jharkhand Loktrantrik Krantikari Morcha (JLKM) chuan seat khat a la ve bawk. Jharkhand-ah hian INDIA bloc hnuaiah JMM, Congress, Rashtriya Janata Dal (RJD) leh Communist Party of India (Marxist-Leninist) Liberation te an thawk ho a ni.