Russia-ah India mi chin hriat lohin an awm

India mi leh sa, Russia sipaia inpete chu Russia-Ukraine ramri beihnaah tirh luh niin heng mite hi tun thlengin an chin hriat an ni lo. Hei hi tun hnaia Ministry of External Affairs (MEA) in a tarlan aṭangin hriat a ni.

Mohammad Amin Sheikh (65) Jammu and Kashmir-a Kupwara a cheng chuan a fapa Zahoor Sheikh(27) chu a chhungte a biak pawp hnuhnung ber chu December 31, 2023 kha niin a sawi a,"Ka fapa hian training tur avangin thla thum chhung ka biak theih dawn loh tia min hrilh hnu lawkah Indian mi Russia ah an thi tih te chu January khan kan hre leh, phone call in kan be tlang thei tawh lo a, tun thlengin kan la be pawp leh lo" tiin a sawi.

Moscow-a Indian embassy ṭum eng emaw zat biak pawh an tum hnuah pawh an fapa chinchang hi hriat zui tur a la awm loh thu sawiin, Sheikh leh a fapa dang pahnihte chu Delhi-ah Ministry of External Affairs (MEA)-ah Russian embassy chhanna hriat beisei hian kar hmasa khan an kal tih tarlang bawk.

Jagdeep Kumar, Punjab-a Jalandhar a cheng pawh chuan March aṭanga a chanchin an hriat tawh loh, a unaupa unaupa Mandeep (30) chanchin hriat tumin a kal ve bawk. A sawi danin a unaupa hi hna zawngin Armenia-ah a kal a, heta ṭang hian Italy pan tur a nih laiin agent ten bumin Russia-ah sipai zawm turin an thawn niin a tarlang. Kumar hian MEA official-te a biak hnuah, MEA lam hian India mi 25 lai chu Russia-a an bo thu hi an lo hirlh ve bawk a ni.

External Affairs Minister S Jaishankar pawhin August 9 khan Lok Sabha ah India mi 91 chu thla kua liam ta chhung khan hruai kir an nih thu a sawi. India mi 69 te chu Russia sipai aṭanga thawnkir hun an nghak mek thu sawi bawkin, hei hi prime minister Narendra Modi-a'n July-a Moscow a tlawh ṭum khan Russia president Vladimir Putin chu mimal taka a sawi pui thu a tarlang bawk.