Union Cabinet-in scheme leh project thar eng emaw zat pawm

Union Cabinet, Thawhṭannia ṭhu khawm chuan ram hmasawnna thlen thei tur scheme leh project thar eng emaw zat an pawm.

Project leh scheme, cheng vaibelchhe tam tak man pawm thar niin heng zingah hian Railway project, One Nation One Subscription scheme, National Mission on Natural Farming (NMNF) scheme, PAN 2.0 project te telin, heng project leh scheme atana sum dah hi Rs vbc 17,843 a tling.

Cabinet Committee on Economic Affairs(CCEA) chuan project thar, Ministry of Railway hnuaia thawh tur atan Rs vbc 7,927 dahin, he project hi Maharashtra, Madhya Pradesh, leh Uttar Pradesh tan tlang rel kawng siamna tur a ni a, kawng siam tur hi km 639-a t hui a ni. Multi-tracking project hian Khandwa leh Chitrakoot district tan tlangin thingtlang khua 1,319 a paltlang bakah mihring nuai 38 laiin an chhawr ṭangkai thei dawn niin an tarlang.

Government Higher education Institution tih hmasawnna tur scheme 'One Nation One Subscription', ram puma scholarly research leh journal publication tana hman theih tur pawm a ni bawk. He scheme hian Government higher education institution, leh research and development laboratory-te chu a huam dawn 2025-2027 atan Rs vbc 6,000 dah a ni.

Heng bakah hian lo neih lam tih hmasawnna turin union cabinet chuan National Mission on Natural Farming (NMNF) project a pawm bawk. He project hi pet project, central sponsored scheme niin sorkar laipuiin Rs vbc 1,584 a tum anga,state sorkarin in Rs vbc 897 an tumpui ve ang. 15th Finance Commission(2025-26) thleng hman tura tih a ni a, rampuma natural farming tih hmasawnna tur atana ruahman a ni bawk.

PAN 2.0 project thar pawm bawkin he project hi Permanent Account Number hman lai tih changtlunna tur a ni a, hemi atan hian Rs vbc 1,435 ruahman a ni. PAN 2.0 hi PAN card neisa te tan pawh a thar a dil ngai loa hman theih tur a duan a ni bawk, he project hi e-Governance project kaltlanga technology huanga hmasawnna thlen thei tur atana tih a ni.