Maharashtra Chief Minister tur la chiang lo

Maharashtra assembly inthlan neih zawh takah BJP kaihhruai ṭangrual pawl, Mahayuti chuan hnehna an chang. Mahse, sorkar thar hruaitu tur Chief Minister ruat tur chungchang ṭangrual party-te ngaihdan a in an loh avangin tun thlengin an la chiang lo.

State 14th Assembly chu nimin khan tawpin, chief minister Eknath Shinde chuan tih dan phung pangngaiin CM a nihna aṭanga banna a thehlut fel tawh. Mahse CM thar tur hi an la ruat fel lo a ni.

Maharashtra assembly-ah hian member 288 awmin rorelna siam tur hian MLA 145 thlawpna neih a ngai. BJP hi party mala seat la hnem ber niin member 132 a nei a, Shiv Sena-in seat 57 leh National Congress Party (NCP) in seat 41 an nei ve bawk. Party mala sorkarna siam thei an awm lo a ni.

BJP chuan chief minister hlui Devendra Fadnavis chu CM tura an duh laiin, Shiv Sena lam hain Shinde hi CM ni chhunzawm turin an duh thung.