Air India titawp dawn lo

India sorkar enkawl Air India thlawhtheihna chu tihtawp a nih loh tur thu Air India Chairman and Managing Director (CMD) Ashwani Lohani chuan a sawi.

"Air India tihtawp tur anga thuthang tam tak awmte hi thu belhchian dawl lo a ni. Sorkar enkawl Air India hi India rama airline lian ber a la ni reng bawk a ni," tiin Lohani chuan a sawi bawk. Lohani hian kar liam ta khan civil aviation minister Hardeep Singh Puri hnenah Air India-in harsatna a tawhte chu thlenin, sum dinhmuna harsatna nasa tak an tawh avang­in thlawhtheihna thlawh chhunzawm tir zel pawh a harsat dawn thu a hrilh a ni.

Minister Puri chuan an harsatna tawhte hi thiam taka lo dawng sawngin, CMD-in an harsatna tawh thu lehkhaa a thlen hnu ni­hnihah Air India-a thawktu ṭhenkhatte leh CMD meeting a ko a ni. He meeting-ah hian private kuta hlan kim a nih chian hma chu sorkar laipui hian a thlauh thlak ngawt dawn loh tur thu an rel.

Puri chuan airline hi private kuta hlan a nih loh chuan hlawkna a tam ṭhin loa, thlak chhiat lam a pan vat ṭhin thu meeting-ah hian a sawi. Air India-ah hian thawktu mi 14,000 an awm niin an tarlang.