DGP Devinder Singh medal leh certificate laksak
Jammu & Kashmir (J&K) thuneitute chuan an suspend tak Director General of Police (DGP) Devinder Singh chu a medal dawn leh certificate dawnte an laksak.
DGP Devinder Singh hi J&K police-te chuan January 11 khan Sopian distirct-a Nazneenpora hmunah an man a, J&K aṭanga tlanchhuah tum Hizbul Mujahideen firfiak pahnih Asif Ahmad leh Naveed Babu-te chu an tlanchuah theih nana puia puh a nih vanga man a nih hnuah, kar kal ta Nilaini khan a hna aṭanga chawlh lailawk tir a ni bawk.
Firfiak pahnih a puih nan hian Singh hian thamna Rs nuai 12 a dawng nia tarlan a ni a, Jammu aṭanga Chandigarh an pan tur chu police-te hian Nazneenpora hmunah an man ta ni. Chandigarh aṭang hian Delhi a 'Republic Day' lawmna awm tura bomb tihpuah tumah police-te chuan an puh bawk a ni.
Man a nih hnuah Singh hi police-te chuan a in an dap sak bawk a, AK-47 rifle, pistol pahnih, grenade pahnih leh pawisa nuai chuang an man a ni. January 16-a Ministry of Home Affairs (MHA)-in a ngen angin, National Investigation Agency (NIA) chuan Singh thubuai hi an chhui mek a ni. Suspend a nih hma hian Singh hi Srinagar Airport-a anti-hijacking unit-ah dah a ni.