Lok Sabha member atan Priyanka Gandhi la lut

Tun hnaia Lok Sabha member atana thlan tlin, Congress party hruaitu Priyanka Gandhi Vadra chu nimin, November 28, 2025 khan Parliament member atan rinawmna thu tiam tira lak luh a ni.

Kum 52 mi, Priyanka Gandhi hi a nuṭa, Rahul Gandhi-a bial chhuahsan, Kerala-a Wayanad biala by-election neihah hneh taka thlan tlin a ni. Priyanka Gandhi hi an chhungkua zinga Parliament-a tel thei pathumna a ni ta a ni. A nu Sonia Gandhi chu Rajya Sabha MP niin, a nuta Rahul Gandhi chu Lok Sabha MP a ni bawk.

Inthlana hnehna a chan hnu hian Priyanka chuan amah vote tlingtu mipuite chu lawm thu hrilhin an tana theih tawp a chhuah tur thu a sawi. Wayanad tan hmasawnna tam tak thlen chu a tum ber a nih thu alo sawi lang tawh a ni.

Nimina Lok Sabha member atana lak luhnaah hian Priyanka hian Kerala tradional saree, 'Kasavu' a inbel a ni. Thu a tiam lai hian Constitution copy a keng a, Hindi in thu a tiam bawk.

Priyanka Gandhi hian kum 2019 aṭang khan politics a luh chilh a, a nu leh a nuṭa pa tan pawh campaign in a fehchhuak nasa hle. Mahse tun ṭum hi inthlana a chuh ve ṭum khatna a ni thung. Inthlan dawn pawh hian Rahul leh Sonia Gandhi pawhin a tlin theihna tan theihtawp an chhuahpui a ni. A khingpui chu vote nuai li chuangin a hneh ta a ni. Nimina MP atana lakluh a nih lai hian a nu leh nuṭa, a pasal Robert Vadra leh an fate pahnih bakah Congress party president Mallikarjun Kharge te an tel. Priyanka bakah Congress hruaitu dang, Ravindra Chavan chu MP atan rinawmna thu tiamtira lak luh a ni bawk a ni.