Indian Navy-in K-4 ballistic missile enchhin

Indian Navy chuan nimin khan nuclear submarine a neih thar, INS Arighaat aṭangin km 3,500 chin kap thei, K-4 ballistic missile an enchhin.

Defence lamin an tarlan danin, test result hi an zirchiang leh phawt dawn a, hemi hnu hian sipai hotute leh ram hruaitute an hrilhfiah dawn a ni.

Tuihnuai lawng, INS Arighaat hi kumin August thla khan Vishakhapatnam-a Ship Building Centre-ah Indian Navy kutah hian hlan a ni. Nimina missile full-range test neih hma hian DRDO chuan tuihnuai aṭanga missile kah chhuah dan tur hi ṭum eng emaw zat a lo enchhin tawh bawk nia sawi a ni. Indian Navy hian missile system hi enchhin belh zel a tum.

Navy hian nuclear submarine hi pahnih a nei mek a, pakhat hi INS Arihant a ni. Heng aṭang hian ballistic missile kah chhuah theih ve ve an ni. Lawng pathumna tur hi nakkumah Navy hnenah hian hlan a ni leh ang.