Kejriwal-a'n dictator-ah Modi sorkar a puh

Delhi Chief Minister Arvind Kejriwal-a chuan Prime Minister Narendra Modi-a kaihhruai sorkar chu dictator-ah a puh a, Delhi Lieutenant Governor hnena thuneihna sang zawk pekna tura hriattirna a tihchhuah pawh dan kalh a ni, a ti.

Delhi acting Chief Secretary ruat chungchangah Delhi-a AAP sorkar leh Delhi Lt Najeeb Jung inkara buaina kal zelah, Ministry of Home Affairs (MHA) chuan hriattirna tichhuakin, LG chuan service, public order, police leh land chungchangah Delhi sorkar rawn kher loin thuneihna a nei a ni, a ti. He hriattirna avang hian Delhi sorkar chuan special assembly, ni hnih awh a koh phah a, assembly-ah hian MHA hriattirna tihchhuah demna resolution pawh an pass nghal a ni.

Kejriwal chuan, "Delhi-a thil thleng mek hi thil hlauhawm tak a ni. BJP kaihhruai sorkar laipui thiltum chu Delhi-in a tuar mek a, hetiang thil hi BJP sorkar lohna state dangahte a la thleng zel dawn a ni. Kan ram hi dictatorship-a dah an tum a, BJP ni lo chief minister zawng zawng hnenah pawh he thilah hian kan inlungrual a, kan ṭanho a ngaihzia hriattir ka duh a ni," a ti.

Delhi CM chuan LG Jung-a thupek angin Delhi-a mi rethei awmna hmunte pawh tihchhiat a ni tiin, hei hi AAP sorkar laka mipuite tihthinrim an tumna a ni tih a sawi bawk.

Special Assembly-a reso­lution an pass-ah, President Pranab Mukherjee chu Consti­tution Article 143 hnuaia a thu­neihna hmang a, Supreme Court hnenah National Capital Ter­ritory of Delhi-a legislative leh executive function-a Delhi sorkar, LG leh sorkar laipui thuneihna leh mawhphurhna neih dante sawichian tir turin an ngen.

MHA-in Delhi-a sorkar hnathawk liante ruat chung­changa Lieutenant Governor hnena thuneihna pumhlum pekna a tihchhuah avangin nimin khan Delhi sorkar hian Delhi High Court-ah petition a thehlut. Hetihlai hian sorkar laipui chuan LG leh CM-te'n buaina an neih meka sorkar laipuiin LG a ṭan tlat chuan thil a ti rinhlelhawm tia Delhi High Court-in a lo sawi tawh chu Supreme Court-ah a thlen bawk a, Supreme Court chuan vawiin hian a ngaihtuah ang.

Delhi High Court chuan May 25 khan thupek tichhuakin, LG-in Delhi sorkar hnuaia officer-te posting leh transfer chungchangah thuneihna a nei lo tih a sawi. High Court chuan LG chu Delhi mipuite'n an aiawh tura an thlan chhuah, Delhi Council of Minister-te thurawn anga kal tur a nih thu leh, a thiltiha sorkar laipuiin a ṭan tlat chu thil rinhlelhawm tak a nih thute a lo tarlang tawh a ni. LG chuan mipuite duhthlannate chu a zahsak tur a ni, a ti.