BJP-in ram pumah bawngsa khap a tum lo: Amit Shah

BJP President Amit Shah chuan rampumah bawng sa khap an tum lo tih sawiin, bawngsa khap leh khap loh chungchang chu state sorkar-te thutlukna a ni, a ti. Hemi rual hian tun hnaia Union Minister Mukhtar Abbas Naqvi-an bawngsa ei te sawisel a, 'a ei duhte chu Pakistan-ah kal mai tur' tia a sawi chu a mimal ngaihdan mai a ni tih a sawi bawk.

Amit Shah chuan, "BJP sorkar chuan bawngsa khap chungchanga thutlukna a siam hmain mipuite ngaihdan a dah pawimawh ang. Rampumah bawngsa hi kan khap ang tiin kan sawi lo," a ti.

BJP sorkarna state, Maharashtra leh Haryana-ahte bawng talh leh a sa eite khap ni mah se, an party chuan sorkarna an channa zawng zawng state-a khap kher an tum lo tih a sawi a, state sorkarte'n mipuite ngaihdan thlirin thutlukna an siam mai dawn niin a sawi.

Hetihlai hian Naqvi-a'n bawngsa chungchang a sawina chhang a, Union Minister vek, Kiren Rijiju-a'n amah ngei pawhin bawngsa a ei thu leh, tuin nge dang thei ang tia a sawi avangin Hindu Sena chuan Rijiju hi minister aṭanga ban an phut.