Ngaihdan thlak vangin Shiv Sena-in BJP sawisel

Shiv Sena chuan Maharshtra-a ṭangrual sorkar an siampui, BJP chu Ram temple leh thildang pawimawhah a ngaihdante a thlak leh vangin a sawisel.

Shiv Sena chuan BJP hian inthlan dawna a manifesto-a a thil tiam leh an thusawi tawh zinga eng emaw zat chu a sut leh niin a sawi. BJP President Amit Shah-a'n an party chuan Ram Temple leh Article 370 chungchanga an thutiamte tipuitling turin member an ngah tawk lo tia a lo sawi tawh chu Sena party chuan chhengletin, "BJP hian thuneihna a chan veleh Jammu and Kashmir hnena special status pekna, Article 370 tihbo nghal a tiam a, mahse J&K-ah hian PDP nena thawkdunin, ṭangrual sorkar an siam ta zawk a ni. BJP hian Uniform Civil Code siam a tum thu pawh a sawi a, mahse hei pawh hi engmah a thlenpui tak tak kan ring lo," a ti.

Sena chuan BJP hian inthlanpui neih dawn khan Ayodhya-a Ram Temple din chungchang pawh a sawi a, mahse a hnuah an party hotu ber chuan MP 370 tal an neih loh chuan temple din hi a theih leh dawn loh tih a sawi leh a ni, tiin an chanchinbu, Saamna-ah a tarlang.

Inthlanpui neih dawna BJP hruaitu Nitin Gadkari, Devendra Fad­navis leh Sudhir Mungan­tiar-te'n Maha­rash­tra-a Vidarbha bial chu state hran pek an nih tur thu an sawi pawh, BJP President chuan Maha­rastra aṭanga Vidar­bha bial ṭhendarh chung­chang kan tiam lo tiin, Sena chuan BJP hian a thu a zuk leh a ni, a ti.