PM Modi leh a policy sawisel vangin zirlai pawl hnawl a ni

Indian Institute of Technology-Madras (IIT-Madras) a zirlai pawl pakhat, Ambedkar Periyar Study Circle (APSC) chu Prime Minister Narendra Modi leh a policy a sawisel avangin an pawl hi hnawl an ni a, function neihna atan campus-a hmun leh bungruate chu an hman khapsak nghal an ni.

Zirlai pawl khap a nih chhan hi Ministry of Human Resource Development (MHRD) in IIT campus-a APSC-in Modi-a kaihhruai sorkar leh a policy sawiselna pamphlet a tihchhuah chungchang IIT-Madras thuneitute hnena a zualko vang a ni. MHRD Under Secretary Prisca Mathew chuan APSC thiltih chungchangah hian zirlai ṭhenkhat, tu tih hriatlohte hnen aṭangin complain an dawng tih ziakin IIT-M management hnenah a thlen a ni.

MHRD hian May 15 khan institute thuneitute hnenah lehkha hi a thawn a, May 22 khan APSC chuan Dean of Students, Sivakumar M. Srinivasan hnen aṭangin APSC chuan a chanvo neihte dik lo taka a hman avangin dan pawna hnawl a ni tih a hriattir a ni.

APSC member-te chuan institute thuneitute thiltih dan chu an dem thu sawiin, a democracy kalphung lo hle tih an sawi. Member-te chuan an thiltih chungchang hi sawifiah tura kohna pawh engmah an dawng lo a, an pawl hnawl a nih thu hi an dawng ringawt tih an sawi. Hemi chungchang sawipui tura Dean an hmuh chuan, an thiltih ṭhin dan chu sim turin a lo hrilh tih an sawi.

Ningani tlai khan member-te hian Director, Dr Bhaskar Ramamurthi hnenah lehkha thawnin, "Kan pawl hian hnam hnuaihnung zawkte ṭanpuina tura Ambedkar leh Periyar-te'n suangtuahna an lo neihte chawinung a, Hindu-te hnenah chi inthliarnain tunlai India-ah bu a khuar mek tih hriattir a, hetianga inthliarna lo thlen chhanah a phena thil awm te hriattir kan tum a ni," an ti.

HRD ministry-a complain thehlut chuan he pawl hian Scheduled Caste leh Sheduled Tribe zirlate chu MHRD leh sorkar laipui laka heltir a, Prime Minister leh Hindu-te huattir a tum a ni, tiin a tarlang.

APSC hnawl a nih tak avang hian nimin khan zirlai eng maw zatin Delhi-a Human Resource Development Minister Smriti Irani chenna in bulah lungawi lohna an lantir. Zirlaite hian minister chu IIT-Madras laka inlulingah an puh. Social media lamah pawh he thil hian inhnialna a chawk chhuak nasa hle a, mi tam tak chuan zirlai pawl dan pawna hnawl a ni hi an dem thu an sawi.