Kejriwal-Centre: SC-in Delhi HC thupek a dang

Delhi Lieutenant Governor nena thuneihna pek chungchanga Delhi-a Aam Aadmi Party (AAP) sorkar leh central-a BJP kaihhruai NDA sorkar inbeihna chu a la kal zel a, Delhi High Court leh Supreme Court-ah an zualko ve ve a ni.

Delhi High Court-in LG-in sorkar hnathawk liante posting leh transfer chungchangah thuneihna a nei lo tia Delhi High Court-in thupek a tihchhuah chungchangah sorkar laipui chuan Supreme Court-ah petition a thehlut a, hei hi nimin khan SC chuan ngaihtuahin HC thupek hi a dansak rih. Sorkar laipui chuan HC thupek hian LG chungchanga Ministry of Home Affairs hriattirna tihchhuahte a hnawl a ni, a ti.

Supreme Court chuan HC thupek tihchhuah hian LG hnena thuneihna pek a nih chungchanga Home Minis­try hriattirna thuchhuah, Delhi sor­karin HC-a a khin chungchang nen inlaichinna a nei tur a ni lo, a ti. Justice AK Sirkri kaihhruai bench chuan SC hnenah hian thutlukna a siam danah May 25-a HC single bench thuchhuah siam chu innghawng tir lo turin a ti a, Delhi sorkarin MHA notification chungchanga petition a thehluh pawh dik taka ngaihtuah turin a ti bawk.

Delhi HC chuan LG thuneihna pek a nih dan chungchanga Home Ministry thuchhuah siam dan chuan rinhlelhna a siam a ni tiin a sawi a, hei vang hian sorkar laipui chuan Special Leave Petition hmangin Supreme Court-ah a zualko a ni. Sorkar laipui chuan HC thupek hian LG leh Delhi sorkar inkar boruak a tikhirh zual niin a sawi.

Hetihlai hian MHA-in LG hnena thuneihna pekna, hriattirna a tihchhuah chungchanga Delhi sorkarin Delhi HC-a a khinna chu August 5 hian ngaihtuah a ni ang.