Nigeria President thar lalut dawn

Nigeria President Goodluck Jona­than chuan President atana thlan thar, dictator hlui Muham­mamdu Buhari hnenah thuneihna a hlan hnuin, vawiin hian President thar hi lakluh a ni ang.

March thlaa President thlanna neih takah khan Jonathan hi a tling zo lo a, mahse a chakloh a pawm thiam dan chuan fak a hlawh phah hle thung. Ningani khan President hian amah thlaktu tur, Buhari leh a vice president tura thlan, Yemi Osinbajo-te chu Abuja-a Presiential villa, Aso Rock a fanpui a, zanriah a buatsaih sak bawk. Zanah Buhari hnenah hian thuneihna hi a hlan chhawng a ni.

Buhari chuan President kal­chhuak tur Jonathan chuan inthlan neihah khan a hneh zo ta lo tih amah ngeiin telephone-a bian a hrilh tih a sawi a, "A thiltih hi Nigeria politics kalphung a thlak dang­lam nasa hle a ni. Thuneihna chan chhunzawm duhin harsatnate siam ni se, Nigeria mipui rethei tak takte'n nasa takin an tawrh phah dawn a ni," tiin, Jonathan-a hnenah hian "Zahawmna kawng i thlang a, Pathian pawhin kan ram hi min ṭanpui ngei ang. Ka lawm takzet a ni," a ti.

Nigeria President thar tur, Mo­ham­mamdu Buhari hi military dicta­tor hlui niin, kum 1984-1985 chhung khan Nigeria ram hruai hna a lo thawk a, eiruknaa fihlim leh thununna ngaisang mi nia sawi a ni. A rorelna hnuaiah hian sorkar hna­thawk, a hunbi dik taka office thleng hman lote chu uṭawk sawta sawttir an ni ṭhin a, hei bakah hian bus changa ding mipuite chu an intlar loh chuan sipaite'n an vaw ṭhin bawk. Muslim ruh tak a ni a, Nigeria-a Muslim tamna, an ram hmarlam bialah pawh Muslim dan, Sharia law hman duhtu a ni bawk.

Goodluck Jonathan hi an ram aṭanga inlakhran duhtu, Islam helho leh eiruknaa inhnamhnawihte laka nem lutukah puh a ni a, hei hi inthlana a chet chhiat chhan nia ngaih a ni.

President thar atana thlan, Buhari chuan sorkar hmasa zawkte'n an lo tihsualte chu tihsual nawn a tum lo tih a sawi a, defence lam tihchangtlun a, eirukna umbo tura beih leh, nikuma Islam helpawl, Boko Haram-te'n Chibok khuaa hmeichhe tleirawl 200 chuang an rukbote pawh zawnchhuah a tiam. Kum 72 mi, Buhari chuan democracy kalphung ang takin ro a rel tawh dawn tih sawiin, democracy lama a piangthar a ni tawh tih a sawi bawk.