India leh Sri Lanka Navy thawk dunin ruihhlo kg 500 an man

India Coast Guard (ICG) ten ruihhlo ton ruk zet an man aṭanga nikhat a liam awrh tihah, Andaman tuipuiah India Navy ten Sri Lanka Navy hnen aṭanga an thu dawn bawhzuiin ruihhlo kg 500 zet an man leh. An ruihhlo man hi crystal meth niin Arabian tuipui huam chhungah an man a ni.

India Navy ruihhlo man hi lawng pahnih aṭangin niin lawng leh thawktute chu ruihhlo an man nen hian Sri Lanka thuneitute hnenah dan anga hmalak chhunzawm turin an hlan chhawng nghal a ni. "Lawng pahnih chu Sri Lanka Navy leh aerial surveillance aṭanga an chhui chhuah niin, heng lawng pahnih aṭang hian ruihhlo crystal meth kg 500 dawn chu kan man a ni" tiin nimin Zirtawpnia Indian Navy thuchhuahah an tarlang.

Navy joint operation an neihnaah vek hian ICG hian ruihhlo an man tawh zinga ṭum khata an man tam ber, methamphetamine kg 6,016 chu Myanmar sangha manna lawng aṭangin Andaman tupui ah hian an man leh bawk. Hemi man tur hian tuipui leh van boruaka an hmanrua te nen ṭangkawpin lawng hi an man theih phah niin ICG chuan a sawi.

ICG-in vawiin thlenga an ruihhlo man tawh zawng zawng hi kg 12,875 tling tawhin, heng an ruihhlo man hi mithiamte thawhrah leh India tuipui venhimna kawnga an tha chakna leh inpekna ropui tak tilang tu a nih thu ICG thupuangtu chuan a sawi bawk.