UN Peacebuilding Commission-ah India thlang nawn

India chu UN Peacebulding Commission (PBC)-ah 2025-2026 atan thlan nawn a ni. Tuna a term chelh mek hi December 31, 2024 hian a tawp tawh dawn a ni.

"India chu UN Peacebuilding Commission (PBC) 2025-2026 chhung atan thlan nawn leh a ni. He pawl dinchhuaktu zinga mi a nih bakah, ram thawhhlawk tak a ni bawk. Khawvela ralmuanna a awmna tur atan a thawk chhunzawm leh dawn a ni," tiin United Nation-a Permanent Mission of India chuan Ningani khan X ah a tarlang.

Peacebuilding Commission hi ram hrang hrang sorkar inthlunzawm pawl niin, he pawl kaltlang hian ram ralmuang loah ralmuanna leh himna a thlen theihna tur atan an thawk ṭhin a ni. PCB-ah hian member state 31 awmin General Assembly, Security Council, leh Economic and Social Council aṭanga an thlan an ni. He Commission hian hmasawnna tur atan UN chhung leh pawn aṭangin nasa takin hna a thawk reng ṭhin a, ram buai kan tih leh harsatna tawkte hnenah chhawm dawlna leh puihna kawng hrang hrangte an pe ṭhin.

India hi UN-in ralmuanna a awm theihna tura a hmalakna kawnga sipai tha chakna hmanga puitu lian ber niin, sipai leh police 6,000 dawn chu UN hnathawhna tur atan hian Abyei, Central African Republic, Cyprus, Democratic Republic of Congo, Lebanon, Middle East, Somalia, South Sudan leh Western Sahara ah te an thawn chuak tawh. Heng zinga mi 180 vel chuan an duty-na hmunah an thi a, UN tana thawk chhuak zinga ram anga sipai nunna chan tam ber a ni.