President-in land ordinance a pawmpui

President Pranab Mukherjee chuan sorkar laipuiin land ordinance a siam chu a vawi thumna atan a pawmpui leh.

Prime Minister Narendra Modi kaihhruai, Union Cabinet meeting chu kar kalta Inrinni khan neih a ni a, land ordinance bill chu tun hnaia Parliament budget session neihah pass theih a nih loh avangin ordinace hi la kalpui an remti.

Official chuan nimin khan ordinance hi President Pranab-a'n a pawmpui thu a sawi a, sorkarin mimal ram a laksakah a ram neitute'n a nihna tur ang taka zângnadawmna an hmuh ngei theih nan ordinance hi la kalpui a ṭul a ni, a ti.

Right to Fair Compensation and Transparency in Land Acquisition, Rehabilitation and Resettlement Act, 2013 chu NDA sorkar chuan nikum December aṭang khan ordinance hmangin a tidanglam tawh a, amendment bill hi pass theih a la nih loh avangin vawi thum ordinance a siam tawh a ni.

Land Acquisition amendment bill chu Lok Sabha-ah NDA sorkar hian pass thei mahse Rajya Sabha-ah member a neih tam tawk loh a pulut duh lo a, Joint Committee of Parliament-in a ngaihtuah mek a ni.

Congress vice president Rahul Gandhi chuan land ordinance kalpui a ni chu sawiselin, Prime Minister Narendra Modi chu loneitute ram chhuhsak tuma hmanhmawh taka cheah a puh. Rahul Gandhi hian Parliament-ah leh pawn lamah land bill siam danglam tumna hi nasa takin a lo dodal tawh a ni.

Union Minister hlui, Jairam Ramesh pawhin land bill chu Parliament Joint Committee-in a ngaihtuah mek a, hetihlai laia Modi-a sorkar thiltih dan chu Parliament zah lohna lian tak a ni, a ti. Bihar Chief Minister Nitish Kumar pawhin sorkar laipui chuan mi rethei zawk, loneitute ram chhuhsak thuai a duh a ni, a ti.