Zirlai pawl ṭhiah vangin IIT-Madras-ah nawrh huaihawt

Prime Minister Narendra Mod leh a policy-te sawisel leh, midang hnenah inhuatna rilru chawh chhuah tuma puhna avangin IIT-Madras a Ambedkar Periyar Study Circle chu Ministry of Human Resource and Development thurawn angin institute thuneitute'n an ṭhiat.

Zirlai pawl ṭhiah a nih avanga lungawi lohna lantirin kar kalta Inrinni khan Democratic Youth Federation of India (DYFI) huaihawtin IIT Madras kawtah mi tam tak an pungkhawm a, police-te nen an innawr buai a ni. Hemi hma, Zirtawpni khan HRD Minister, Smriti Irani chenna in kawtah National Students Union of India (NSUI) chuan lungawi lohna an lo lantir tawh bawk.

DYFI member-te chuan Modi-a kaihhruai sorkar leh HRD Minister Irani an duh loh thute an aupui a, IIT-Madras thuneitute thiltih dan an dem thu sawiin, zirlai pawl an ṭhiahsak avang hian institute thuneitute chunga action lak an phut thu an sawi.

Tamil Nadu-a eptu party, DMK leh MDMK chuan IIT-M thuneitute chetdan chu freedom of expression palzutna a ni, a ti. DMK hotu, Karunanidhi chuan technical institute-ah hian boruak muanawm tak a awm leh theihna tura inrawlh turin PM Modi a phut thu a sawi. Karunandhi chuan HRD Ministry-in tu thawn nge tih pawh hriat loh lehkha a dawn behchhana institute thuneitute hnenah zirlai pawl laka action la tura a ngen mai chu a dem thu sawiin, Modi-a minister-te'n an thuneihna hmanga hetiang thila an inrawlh fo chuan zirlaite leh ram himna thlengin a nghawng thei dawn a ni, a ti.

CPI State Secretary R Mutharasan pawhin IIT-M thiltih dan chu a dem thu a sawi a, hemi rual hian he thutlukna hi institute-in ama thua a siam ni loin, sorkar laipuiin ti tura a phut vang a ni, a ti. APSC ṭhiahsak a nihna chu sut leh turin a phut bawk.