PM Modi-an 'One Rank, One Pension' hman a tiam

Prime Minister Naren­dra Modi chuan nimin khan thla tina radio-a hun a hman ṭhin, Maan Ki Baat program a hmang leh a, ex-servicemen tana 'One Rank, On Pension' (OROP) scheme kalpui a tiam a, mahse a tihfelna turin hun a duh deuh dawn tih a sawi.

PM Modi chuan OROP chungchang chu kum 40 chhung buaipui a ni tawh tih sawiin, sorkar hmasa khan he thil hi politics khelhna hmanrua atan a hmang a ni tiin a sawisel nghal bawk.

Modi chuan scheme kalpui chu thil awlsam tak a ni lo tih sawiin, department hrang hrangte an thawhho a ngai a ni, a ti. Defence mite inpekna chu fakin, anmahni ngei pawh a lo kawm tawh avangin an harsatna hmachhawnte pawh a hriatthiampui tih a sawi.

India rama ex-servi­cemen maktaduai hnih velin hun rei tak chhung chu OROP hi hman an lo phut tawh a ni.

PM chuan tun hnaia sorkar laipuiin mi retheite tana security scheme pathum a siam- Pradhan Man­tri Suraksha Bima Yoja­na, Jeevan Jyoti Bima Yojana leh Atal Pen­sion Yojana tlangzarh a nih chungchang pawh a sawichhuak a, heng scheme-te hi tlangzarh anih aṭanga ni 20 chhung­in mi vaibelchhe 8.5 chuangin an zawm tih a sawi.

Ramchhunga lonei­tute puala TV channel siam, DD Kisan channel hawn chuan a tihlim hle tih PM chuan a sawi a, he TV channel hi open university ang a ni tiin, "Kisan TV channel-a zirte leh zirtitute pawh lonei­tu vek an ni dawn a ni," a ti. He TV kaltlang hian ramchhung hmun kil­khawr zawka loneitute pawh an lo neih dan kawng­ah zirtirna ṭha zawk leh hlawk zawk pek tum an ni.