India ramah hri kai hmuh chhuah tam ber ni a thleng leh

India ramah Covid-19 hripui lengin hluar lam a la pan zel a, nimina Ministry of Health and Family Welfare-in report an tihchhuahah chuan Ningani khan hri kai hmuh chhuah thar mi 95,735 an awm leh a, hei hi ni khata hri kai hmuh chhuah tam ber ni a ni leh.

Sorkar report-in a tarlan dan chuan India ramah hian hri kai 44,65,863 an awm tawh a, darkar 24 chhungin mi 72,939 lai enkawl dam lehin hri kai zinga 34,71,783 chu an dam leh tawh a ni. Ningani khan mi 1,172-in an thihpui leh a, hei hi NDTV chuan ni khata thi tam ber ni niin a report a, hei nen hian India ramah Covid-19 vanga thi mi 75,062 an awm tawh a ni. Nimin report tihchhuah thlengin hri kai mek 9,19,018 an awm.

India rama Covid-19 kai enkawl dam leh tawh rate hi  77.74% a ni a, thihpui rate chu 1.68% niin hri kai mek rate chu 20.58% a ni bawk.

Indian Council of Medical Research (ICMR) chuan ni khatah sample 11,29,756 an endik leh tih nimina report an tihchhuahah chuan an tarlang a, India ramah hian hri len ṭantirh aṭanga nimin thleng khan sample 5,29,34,433 endik a ni tawh.

ICMR hian sample endikna tur laboratory pawmpui 1,686 lai a nei tawh a, 1042 chu sorkar laboratory niin 644 chu private laboratory a ni bawk.

Maharashtra chu India ram State/UT zinga hri kai tamna ber a la ni chhunzawm zel a, nimin khan hri kai hmuh chhuah thar 23,577 awm lehin mi 9,67,349-in hri an kai tawh. 

Heng zinga 6,86,462 chu an dam leh tawh a, 27,787-in thihpuiin 2,53,100 chuan an la kai mek.

Andhra Pradesh-ah hri kai nuai 5 chuang an awm a, Tamil Nadu leh Karnataka-ah nuai 4 chuang awm bawkin Uttar Pradesh leh Delhi-ah chuan nuai 2 chuang an awm tawh bawk. 

West Bengal, Bihar, Telangana, Odisha, Assam leh Gujarat-ahte pawh hri kai hmuh chhuah nuai chuang an awm tawh a ni.

India ram hi hri kai tam ram pahnihna niin, hri kai tam berna ram USA aiin nuai 19 chuangin hri kai an la tlem zawk a ni. 

Government laboratory    :     1042

Private laboratory    :     644

Real-Time RT PCR hmanna    :      860 (Govt: 469 + Private: 391)

TrueNat hmanna    :     705 (Govt: 539 + Private: 166)

CBNAAT hmanna    :     121 (Govt: 34 + Private: 87)

Total No. of Labs    :     1686

1    Maharashtra    9,67,349    2,53,100    6,86,462    27,787

2    Andhra Pradesh    5,27,512    97,271    4,25,607    4,634

3    Tamil Nadu    4,80,524    49,203    4,23,231    8,090

4    Karnataka    4,21,730    99,489    3,15,433    6,808

5    Uttar Pradesh    2,85,041    64,028    2,16,901    4,112