Rajasthan cabinet-in sakhaw inleh khapna bill pawm

Rajasthan cabinet, Inrinni liam taa ṭhukhawm chuan tih luihna hmanga sakhaw danga inleh tir tih tawpna turin, sakhaw inleh khapna bill, Anti-Conversion Bill a pawm. Parliament session lo awm tur neih chhungin State Legislature-ah put luh tum a ni.

Deputy chief minister Prem Chand Bairwa chuan he billah hian tih luihna hmanga sakhaw dang inleh tirtute chu hremna na tak pek anni dawn tih sawiin, kum 1-5 thleng lung in tan tir theih an ni dawn a ni.

"Mipuite chu an sakhaw la hriat ngaih lohahte thlem luh an ni ṭhin. He bill duang tur hian state dang policy hmante pawh zirchian a ni. Hremna hrang hrang pawh kan siam a, hei hi sakhaw inleh luihtir tihtawp theihna turin kan ruahman a ni," tiin thuthar lakhawm tu a kawm naah hian Bairwa hian a sawi.

Chief minister Bhajan Lal Sharma pawhin he bill hian mimal emaw, zirna inah emaw zirtirna dik tawk lo leh leh nawr luihna hmanga midangte an sakhua inlehtir a khap vek dawn tih a sawi. "Rajasthan sorkar hian dik lo taka sakhaw inlehtirna thleng ṭhin hi tih tawp a tum a ni. Hei vang hian cabinet meeting chuan 'The Rajasthan Prohibition of Unlawful Conversion of Religion Bill-2024' chu Assembly-ah pharh turin a rel a ni," tiin X-ah a tarlang.

Law and parliament affairs minister Jogram Patel pawhin he thutlukna siam hian an state-ah vantlang hamṭhatna leh state hmasawnna a thlen tur thu a sawi a ni.