Maharashtra CM tur BJP hruaitu in ruat dawn

Maharashtra assembly inthlan neih zawh takah BJP kaihhruai, Mahayuti ṭangrual pawl chu thlan tlin ni mah se tun thlengin chief minister tur an la ruat fel thei lo. CM tur chungchangah ṭangrual pawlte an thu a inhmu thei lo a, hun rei tak tih khawtlai a nih hnuah CM tur hi BJP hruaituten an ruat dawn.

Assembly inthlan result puan a nih aṭanga ni ruk liam hnuah pawh CM tur hi ruat fel a la ni lo. Hemi vang hian kar liamta Zirtawpni khan Union Home Minister Amit Shah leh BJP national President JP Nadda te leh Mahayuti-a tel party dang hruaitu pathum te chuan meeting neiin BJP CM an nei ngei dawn thu an tarlang.

BJP leh Shiv Sena te chuan Chief Minister thar lawmluhna hi December 5 ah neih tum a nih thu sawiin, party pahnihte hian sorkar thar siam a nih lawk lohna chhan hi a chhan in anglo ve ve an sawi thung. " Kan pahnih chuan kan in be ve ve tawh, mahse CM thlan chungchanga harsatna thlentu nih kan duh loh ve ve avangin thutlukna chu BJP hruaitu kutah kan dah a ni" tiin Shiv Sena lam hian an sawi.

Heng thil avang hian BJP hruaitute chuan pawl pahnihte rilru tih nat lohna tur a thutlukna siam a ngaih avang in beisei angin thutlukna siam zung zung a harsat thu an sawi ve bawk. Hetih lai karah hian BJP hruaitu tam zawk te chuan CM atan hian Devendra Fadnavis chu an duh deuh fur niin an tarlang bawk.