Maharashtra CM atan Fadnavis ruat a ni ta

Hun eng emaw chen Maharasthra chief minister tur ruat fel thei loa an khawtlai hnuah, Pathianni zan tlai tawh takah khan BJP chuan deputy chief minister ni lai, Devendra Fadnavis chu Chief Minister thar atan a ruat fel ta.

Chief Minister thar tura ruat, Fadvanvis hi legislature party meeting neih veleh leader atan thlan a ni dawn tih BJP hruaitu chuan a sawi. CM kal chhuak tur, Eknath Shinde pawhin BJP-in CM tura a thlan chu a thlawp tur thu a sawi.

Maharashtra assembly inthlan neihah BJP kaihhruai, Mahayuti ṭangrual pawl chu thlan tlin an ni a, mahse inthlan result puan hnuah ṭangrual pawla tel party dang, NCP leh Shiv Sena te nen CM tur chungchangah an thu a inhmu mai thei lo. Hei vang hian hun eng emaw chen CM tur hi ruat fel lohin a awm a ni.

BJP hruaitu pakhat chuan Pathianni zana meeting-ah Maharashtra chief minister thar atan Devendra Fadnavis chu ruat a ni ta tih sawiin, sorkar thar hi December 5 zanah Mumbai-a Azad Maidan-ah lak luh tura tih a nih thu a sawi. He hun hi prime minister Narendra Modi chuan a hmanpui ang.

Mahayuti hian Maharashtra-a assembly seat 288 awmah seat 230 an la a, BJP hian seat 132 lain, Shiv Sena-in 57 leh Nationalist Congress Party (NCP) in seat 41 an la ve bawk.