BSF in dan phal loh thil an man hnem

India ṭhenawm ram te zingah tualchhung buaina hrang hrang a chhuah avangin, ramri kaltlanga India rama rawn luh tum pawh an pung hle.

Ramri venhim hna thawktu, Border Security Force(BSF) chuan kumin August thlaa Bangaldesh-a tualchhung buaina a chhuah hnuah, Border Guard Bangladesh(BGB) nen meeting ṭum 643 an neih tawh thu an tarlang.

BSF chuan 60th Raising Day of the Border Guarding Force lawmnaah hemi chungchang hi sawiin, Eastern Command huam chhungah Bangladesh nena ramri inṭawm, km 4,096. 67-a thuiah venhimna hna hi an thawh thu an tarlang.

Kumin August 4 khan Bangladesh-ah tualchhung buaina a chhuah ṭan aṭang khan BSF hian ramriah SCPc(simultaneous-coordinating patrolling to keep vigil) ṭum 27,213 nei tawhin, BGB nen pawh meeting vawi 643 zet an nei tawh tih an sawi.

Indo-Bangladesh ramri kaltlanga India rama luh ruk tum, Bangladesh mi 2,294 an man tawh. Kum khat huam chhungin Eastern Command huam chinah hian ruihhlo Rs vbc 119.52 hu, ralthuam leh a kaihhnawih Rs vbc 27.77 hu bakah rangkachak kg 174.65 a rit leh Rs vbc 117.31 hu chu an man tawh tih an tarlang bawk.

BSF Eastern Command-a Additional Director General Ravi Gandhi chuan 60th Raising Day lawmnaah hian thu sawiin, Indo-Bangladesh border venghim tur hian Eastern Command chu nghet takin ven him hna thawk turin a dinna ngaiah a la din reng thu a sawi. "BSF chuan company 104 chu Manipur-a duty turin kan tir tawh a, an zinga mi pahnihin nunna chanin mi pariatin hliam an tuar bawk. Ralthuam 83 leh silaimu round 768, ralthuam hrang hrang mu chu Manipur operation-ah hian kan man tawh a ni" tiin a sawi lang bawk a ni.