Parliament Thlasik Ṭhutkhawm nei mumal thei lo

Parliament thlasik ṭhutkhawm neih mek chu member-te in auh buaina avangin rorelna mumal nei thei loin hun eng emaw chen an awm tawh. Nimin, Thawhṭanni pawh khan eptuten Adani Group buaina leh Manipur dinhmun chungchang ngaihtuah ho an phut avangin an in aubuai leh a, rorel inkhawm tih tawp lailawk a ni leh a ni.

Hun rei tak rorelna mumal nei thei loa an awm chungchang hi INDIA- party hruaitute chuan Lok Sabha-a Leader of Opposition Rahul Gandhi kaihhruaia meeting an neihnaah sawi hoin, rorelna tluang taka kalpui a nih theihna tura inrawlh turin House Speaker hmuh an rel a ni.

Rajya Sabha-ah pawh US Justice Department-in thamna pe leh eiruknaa inhnamhnawiha Gautam Adani a puhna chungchang sawiho phutna motion pawh an pu lut bawk. An zingah hian Congress MP Manickam Tagore pawh telin, hemi chungchang hi chhui chian tura sawi ho thuai a ṭul thu a sawi.

AAP MP Sanjay Singh pawh Rajya Sabha-ah Delhi khawpuia dan leh thupek dinhmun chhe zel ngaihtuah ho a phut bawk a, Dravida Munnetra Kazhagam (DMK) MP Tiruchi Siva pawhin Manipur tualchhung buaina thleng mek chu House-a sawiho a duh thu a thlen bawk.