Karnataka-in Jaya-i thubuai a appeal dawn

Karnataka sorkar chuan Kar­nataka High Court-in Tamil Nadu Chief Minsiter leh AIA­DMK hotu, J Jayalalithaa-i eiruk thubuaia fiahlima a puanna chu Supreme Court-ah khin let a tum.

Jayalalithaa-i hi kum 1991-1996 chhunga Chief Minister a nih laia a sum lakluh phu loa hausaa puhin, eiruk thubuai siamsak a ni. Bengaluru trial court chuan a thubuaiah hian thiam loh chantirin, kum li tang tur leh cheng vaibelchhe 100 chawi turin a hrem a ni. Hei vang hian Jaya-i hi Tamil Nadu CM a nihna aṭangin a bang a, MLA a nihna pawh hlihsak a ni bawk.

Mahse Jaya hian trial court thutlukna hi Karnataka High Court-ah a appeal a, High Court chuan an puhnaah hian finfiahna a ṭha tawk lo nia sawiin a thubuai aṭang hian a fihlimtir a ni. A thubuaia a fihlim tak avang hian Jaya-i hi Tamil Nadu Chief Minister-a dah let leh a nih theihna atan a ban dawna amah thlaktu tura a ruat, O Panneerselvam chuan CM anihna aṭangin banna a thehlut a, May 23 khan Jaya-i hi CM atan lakluh leh a ni.

Karnataka Law Minister, TB Jayachandra chuan nimin zing khan state cabinet-in Jaya-i chungchanga High Court thu­tlukna hi Supreme court-a appeal a rel tih a sawi. State sorkar hian HC thutlukna hi SC-ah hian ni 90 chhungin a duh chuan a appeal thei a ni.

Tamil Nadu-a eptu law, DMK hruaitu M Karunanidhi chuan Jaya-i thubuai tihtawp a nih dan hi Supreme Court-a appeal turin Karnataka sorkar hi a lo nawr tawh a, an party pawhin appeal an tum thu a sawi.

Jaya-i hi CM atan lakluh ni mah se, thubuai siamsak a nih khan MLA a nihna hlihsak a ni a, hei vang hian CM atana lakluh a nih aṭanga thla ruk chhung ngeiin assembly member atana thlan a ngai a ni. Hemi atan hian tun thla chhungin Radhakrishnan Nagar constituency-ah by-election buatsaih tum a ni.