PM Modi-a'n Israel tlawh a tum
Prime Minister Narendra Modi chuan June 6-a Bangladesh a tlawh tur thu a tichiang tawh a, hei bakah hian Israel ram tlawh a tum bawk a, a hun erawh sawichian a la ni lo. Israel-ah hian a zin a nih chuan India Prime Minister zinga Israel ram tlawh hmasa ber a ni ang.
Pathiannia New Delhi-a press conference a neihah, External Affairs Minister Sushma Swaraj-i chuan PM zin tum chungchang hi a sawichhuak a, PM zin hun tur hi tihfel la ni lo mah se, buaipui mek a ni, a ti.
Swaraj-i chuan amah ngei pawhin Israel, Palestine leh Jordan-te chu kumin kumtawp lamah tlawh a tum thu leh, June thla hian Non-Aligned Ministerial Meet hmang tura Tehran-a kal a tum thu a sawi.
India leh Israel hian kum sawmhnih chuang zet chu inlaichinna ṭha tak lo nei tawh mah se, Prime Minister zingah Israel tlawh an la awm lo. Kum 2000-a NDA sorkar laia foreign minister, Jaswant Singh khan Israel hi a tlawh a, India foreign minister zingah Israel ram kal hmasa ber a ni bawk. Kum 2003 khan Israel PM Ariel Sharon chu rawn zinin, Israel PM zinga rawn zin hmasa ber a ni.
Israel ambassador Daniel Carmon chuan Modi-a'n an ram tlawh a tum chu lawmawm a tih thu a sawi a, hei hian ram pahnihte inlaichinna pawh a tihngheh zual ngei a rin thu a sawi.