Thamna pek tuma puh Telangana MLA man
Telangana-a Telugu Desam Party (TDP) MLA, Revanth Reddy chu Telangana Legislative Council inthlanna neih turah TDP-BJP candidate vote tura MLA pakhat thamna pek tuma puh a nih vangin man a ni a, ni 14 chhung judicial custody-a awm tura tih a ni.
Anti-Corruption Bureau (ACB) chuan Pathianni zan kha Revanth hi manin, magistrate hnenah kalpui nghal a ni. Magistrate chuan Revanth leh a thurualpui pahnihte chu judicial custody-ah a thawn nghal a, hemi rual hian jail-a dahluh a nih hmain inthlanah hian vote thlak a phalsak bawk. Nimin khan Legislative Council inthlan hi neih a ni.
TDP MLA, Revanth hian Assembly-a Anglo-Indian community nominated member, Elvis Stephenson hnenah thamna cheng nuai 50 pek a tum laiin Vijayapuri colony-a a chenna inah man a ni. ACB official-te chuan Revanth hian TDP-BJP candidate vote turin Stephenson hi cheng vaibelchhe nga thamna pek a tiam niin an sawi. An inbiakna hi spy camera hmanga lak vek a ni a, thamna sum ṭhenkhat a pek lai hian ACB official-te hian nangchingin an man ta a ni.
ACBI Director General AK Khan chuan ni hnih liamta khan complain an dawn thu sawiin, a rukin an chhuizui ta niin a sawi. MLA hi Prevention of Corruption Act leh Indian Penal Code hnuaiah thubuai siamsak nghal a ni.
Revanth Reddy chuan thilsual a tih loh thu leh, Telangana-a rorellai, Telangana Rashtra Samithi (TRS) sorkarin tihchhiat tuma an beihna a ni tiin a sawi thung.