Cyclone Fengal vangin mi 12 in nunna chan tawh

Tamil Nadu-a cyclone Fengal tlehin chhiatna athlen vanga thi chu mi 12 an tling tawh. Thlipui tleh hian ruah a ken tel bawk avangin state chhunga district hrang hrangah chhiatna thleng a awm nual a ni. India Mateorological Department(IMD) chuan ruah hi a la sur chhunzawm dawn niin a sawi.

Cyclone Fengal vang hian mi 12 in nunna an chan bakah, chenna in 721 chuang a chhe bawk. Ranvulh 963 thi tawhin thlai chinna hmun hectare 2.11 chuang a chhe tawh bawk a ni. Ruahsur nasa vangin kawngpui, km 9,500 a thui leh culvert 1847 bakah tanky 417 a chhia a, transformer 997 leh thirban 23,664 a chhe bawk. Anganwadi centre 4,200, primary health centre 205, school building 5,936, community hall 381 leh tui sem chhuahna hmun 623 a ti chhe tawh nia tarlan a ni.

Prime minister Narendra Modi chuan nimin khan Tamil Nadu chief minister M.K. Stalin biain, an state-in thlipui tleh leh tuilian avanga harsatna an tawh mek chungchangte an sawi a ni. Modi chuan sorkar laipuiin a theih anga a puih zel tur thu a hrilh bawk.

Chief Minister chuan nimin vek khan Villupuram, Cuddalore leh Kallakurichi district-a thlipui leh tuilian tuarte hnenah chhawmdawlna Rs 2,000 ṭheuh pek an nih tur thu a puang. Harsatna tawkte chhanchhuah hi Indian Army ten an thawk mek a ni.