Srinagar-ah Asia-a Water Transport Service 'Uber Shikara' hmasa ber hmang

Asia-a a hmasa ber turin, Uber chuan tui chunga lawng hman theih (Water Trasport Service), Uber Shikara service chu an app kaltlanga pre-booking chu Srinagar-a Dal Lake-ah a hmang ṭan ta.

Dal Lake tlawhtu khualzinte chuan harsatna tawk loin Uber hnuaia lawng book theihna tlangzarh hmasa ber, 'Uber Shikara' hmang hian dil leh a chheh vel hmun mawi tak tak te an fang thei tawh dawn a ni. Apps kal tlangin lawng hi a hauh lawk vek theih tawh dawn a ni.

Uber India and South Asia, president, Prabhjeet Singh chuan,"Uber Shikara hi tunlai technology leh hnam tihdan phungte kaikawpa, khualzin leh veivak te tana awlsamna tur duan a ni" tiin a sawi. Uber Shikara hi company tana mellung pawimawh tak niin, Asia-a a hmasa ber a ni a, hetiang lawng service book theih hi Italy-a Venice ah hman a ni bawk.

Dal Lake hi square kilometer 18-a zau niin dil kam hi km 15 a thui a ni a, khualzinte tlawh ṭhin hmun lar tak a ni. Uber Shikara hian vawi khatah mihring pali phur theiin zing dar 10 aṭanga tlai dar 5 thleng hman theih a nih bakah, darkar 12 emaw ni 15 hma lamah te lawng hi hauh lawk theih tura ruahman a ni.