IIT-M buaina: State dangah nawrh huaihawt

IIT-Madras-a zirlai pawl pakhat, Ambedkar-Periyar Study Circle (APSC) chu Prime Minis­ter Narenra Modi leh a policy kalh zawnga thu thehdarha puh an nih avangin thuneitute'n zirlai pawl hi an ṭhiahsak a, hemi duh lohna lantirin zirlaite chuan nawrh an huaihawt chhunzawm zel a, IIT-Bombay-ah pawh nawrh huaihawt a ni bawk.

Nimina IIT-Madras-a nawrh huaihawtnaah zirlaite leh police-te an innawr buai a, police-te chuan zirlai 100 vel manin, campus chhungah hian media mite luh an phal lo bawk.

Mumbai-ah pawh Thawhṭanni khan APSC ṭhiahsak a nih vanga lungawi lohna lantir chhun­zawm a ni. IIT Bombay-a zirlaite chuan, APSC thiltih danah hian thil dik lo an hmuh loh thu sawiin, ṭhiah a ni chu an dem thu an sawi. Thil dik lo a lo ti a nih pawhin, he pawl hi ṭhiahsak nghal mai loin insawi­fiahna hun siamsak tur a ni, tiin an sawi bawk. IIT-Bombay zirlaite chuan IIT-M thuneitute thiltih dan an demna lantirna atan an zirna inah APSC an din ve nghal a ni.

Nawrh huaihawtte hian poster hmangin an lungawi loh thu an tarlang a, mahse heti chung hian IIT security personnel, thuneitute leh police-te chuan an chunga action lakah an vau tho niin an sawi. An poster tara HRD Ministry chungchang an ziahlante pawh paihbo tura hrilh an nih thu sawiin, "He thil hi sorkar dodal zawnga eng thil mah sawi lo tura vauna angah kan ngai a ni," an ti.

IIT Delhi pawhin APSC ṭhiah an duh lohna lantirin Ambedkar Periyar group an din ve nghal bawk a, IIT Kanpur pawhin Face­book page siamin sorkar leh IIT-Madras thuneitute thiltih dan an duh lohna thu an tarlang bawk. Kolkata-ah pawh zirlaite hian APSC thlawpna lantir nan Facebook page hran an siam bawk.