Delhi ACB chungchangah CM leh LG inep leh

Delhi acting Chief Secretary ruat chungchangah Delhi Chief Minister Arvind Kejriwal leh Lieutenant Governor Najeeb Jung inkar boruak a chhe hle a, an buaina vang hian Supreme Court leh Delhi High Court-ahte an zualko a ni.

Chief Secretary ruat chung­changa an buaina a la rehfel hmain, CM leh LG hi Delhi Anti-Corruption Branch (ACB) ruat chung­changah an buai leh.

Delhi sorkar chuan ACB-ah hian Bihar Police officer panga a dah a, hei hi LG office chuan sawiselin, hetianga ruatna tura thuneihna chu LG chauhin a nei a ni, a ti.

Thuchhuah siamin, LG office chuan, "ACB Delhi hi Ministry of Home Affairs (MHA) in a tarlan angin LG thuneihna hnuaia awm a ni," a ti. Delhi Police pawn lam mi officer-te dah tum chungchangah LG hian Delhi sorkar aṭangin rawtna engmah a dawng lo a ni, a ti.

Hetihlai hian Del­hi-a AAP sorkar chuan Delhi sorkar leh ACB hian police officer, ramchhung khawi hmuna mi pawh ruat turin thuneihna pum­hlum an nei a ni, a ti.